//Welcome back-開學頌//
每年開學都係老師最頭痕既日子，因為係門口總會上演母子/父女難離難捨既一幕。大家唔好以為只係第一日番學既BB會喊，其實近年亦都愈黎愈多升左K2或者K3既BB會喊。
每一年既呢段日子就會有好多有血有淚既故事發生係我地身上，等Missfreckle同大家係咁二分享下多年黎既趣事。
1.
每年都係幼稚園老師練大隻既好日子，當BB失控大喊，老師就要當機立斷咁抱走BB. 無論BB大隻定細隻，老師都要果斷地把起，然後頭也不回咁向課室行去。
正所謂，長痛不如短痛嘛！
但最難抱既，都係喊到顛失晒控既K2仔，抱完簡直變大力水手。
2.
為左令DaddyMammy留低唔捨得走，小朋友會施展混身解數，包括經常講啲好搧情既說話，例如『媽咪我真係好愛你，唔好走啦』同埋『爸爸，唔好掉低我一個人係度』務求行拖字訣，拖得一分鐘得一分鐘。
3.
有時為左令小朋友成功離開父母，老師係抱佢地既時候唔止有淚，仲有血。我試過食左一隻著新皮鞋既天殘腳，又試過俾一個發狂既BB既指甲劃到有幾條血痕係頸。
4.
老師為左令小朋友更快適應，有時都會施展『語言偽術』。當小朋友大喊『我要媽咪』，我地會回應『好呀，而家就打電話俾媽咪』仲會拎個手提扮打，務求令佢相信我地。
當小朋友大叫『我唔番學啊』我地會回應『好呀，唔使番學架，我地淨係玩玩具』繼而講一堆卡通人物名分散佢注意。
5.
有時爸爸媽媽都會俾張相小朋友袋住，等佢掛住媽咪個陣拎黎睇下。試過有個好乖既小朋友，一直都細細聲啜泣，得閒又會係褲袋拎張相出黎望下，再好淒慘咁叫『媽咪呀…媽咪…』到食茶點個陣，佢又放張相係台面，唔單止摸住張相啜泣叫媽咪，佢仲搣左啲蛋糕碎放係張相上面俾『媽咪食』。
最好笑係，張相係黑白色。
#開學頌 #有血有淚 #家長記得唔好俾黑白相小朋友袋住
Search